صباح الفل يا فندم حضرتك مواطن في بلدنا ؟؟ يبقى اكيد محتاج تطلع بطاقة شخصية وتعمل فيش وتشبيه وتجيب نموذد 9 جند واستمارة تسع تلاف وحداشر وختم نسر بخمسة وعشرين ريشة ومنقار مكسور جه يا فندم دليلك المريح في التعامل في دواوين الحكومة في 13 نصيحة .
1 – على عكس ما يشاف إن مرواحك بدري في دواوين الحكومة حيخليك تخلص بدري وتخلص بسرعة ..دع طبعا الخطأ الأول اللي بيودي المواطنين في داهية حتروح بدري وتعمل فهلوي حتكتشف إنك في بلد الفهلوية وكله رايح بدري وغالبا حتطحن حتطحن فأجمل حاجة تعمل فيها عبده وتروح متأخر . يعني بعد حداشر كده تقريبا .
2- الزحام اكبر بيئة خصبة للعراك لو حصل واتورطت في خناقة خليك ذكي فكك من اسلوب انت مش عارف انا ابن مين ؟؟ أنها بقت مقفوشة أوي لأن لو حضرتك ابن حد ما كنتش وقفت الوقفة السودة دي مع عامة الشعب والرعاع وبقايا المجتمع .
3- ما تتخيلش إن علشان في القسم انك في امان أحسن مكان تتنشل فيه هو الأقسام . وكفاية بصة على شباك استخراج بطايق الرقم القومي في المنتزه وانت تعرف كده بعد ما تشوف القسم بجلالة قدره معلق يافطة مكتوب فيها احترس من النشالين ..نصيحة ..حرّس وخوّن .
4- اللحلوح او الجنيه هو مفتاح السر في الدواوين ادفعه بمزاجك اسحن ما تدفعه غصب عنك .
5- الموظف سيدك و تاج راسك وحبيبك وحبيب قلبك ما تهتمش اطلاقا بنظرة الأشمئزاز والقرف اللي بيبصلك بيهم قديما قالوا قرف الحبيب زي الحليب ...
6- لو الموظف شتم حضرتك فعليك تذكر الحكمة القديمة التي تقول لو كان لك عند اللي اسمه ايه حاجة ...
7- اوقات الموظف المستقطعة محفوظة ليه .وبيانها كالتالي نصف ساعة علشان الفطار ونص ساعة علشان يشرب الشاي وعشر دقايق كل ساعة علشان يشرب سيجارة وربع ساعة كل ساعة يدخل الحمام .وساعة إلا ربع يصلي الظهر ونص ساعة يريح بعد ما جه من الصلاة ..ويضاف ساعة ونصف لتقطيف الملوخية وتقميع البامية للموظفات .أحرص على أن تعطي الموظف حقه كما تحب أن يعطيك حقك .
8- احسن مناح ديمقراطي حتلاقيه في الطوابير على شبابيك الحكومة .. احرص على شتم الحكومة ولعن سلسفيلها اثناء وقوفك في الطابور فهي فرصة لن تتاح لك كثيرا في الخارج .
9- إذا كنت من سكان المنتزه خلي بالك وانت في التجنيد من الماسورة اللي بتسقط على اللي واقفين على شباك التجنيد مياه مش ولابد اما سكان الرمل خلي بالك احسن العربية تلهفك وانت واقف في الطابور اللي موجود في عرض شارع رئيسي اما بتوع مينا البصل الظابط بتاع بطايق الرقم القومي قليل الأدب وبيشتم بالأم احذروا .
10- الختم مش واضخ يا فندي – فوت علينا بكره – ناقصط دمعة – الورق غير مستوفي ..إلخ كلها عبارات باللغة الحكومية معناها بالعربي فّوت بريزة يا كابتن .
11- استخدم حقك الدستوري في مسح اصابعك الملوثة بالحبر بعد تبصيمك على حائط الصسم البصمات الممسوحة على حائط القسم اكبر لوحة احتجاج على الغباء اللي اسمه التبصيم ..اللي استبدله العالم كله بنظام الكمبيوتر .
12 -بالنسبة لمستخرجي رخصة السواقة الواسطة اسرع طريقة للحصول عليها ولو ما تعرفش العربية المرسيدس من العربية ام حمار اما لول لم تجد واسطة مش حاقولك اعتمد على نفسك لأ اعتمد على السواق اللي جنبك اظرفه عشرين جنيه لو لو انت متمكن وعايز تبعد اذاه عنك وثلاثين علشان يساعدك في الدواسات وخمسين علشان ينزلك انت ويعمل هو الأختبار .
13- اياك ثم اياك ثم اياك ودخول الحمام في أي مصلحة حكومية ..امسك نفسك لغاية آخر لحظة ولو نفسك ما قدرتش تمسكها واعصابك ما اتحملتش وحصل المحظور ده حيكون اكرم لآدميتك من دخول حمام في مصلحة حكومية .
الأربعاء يوليو 18, 2007 8:59 am
